2Pe 2 | MED | STEP | Wote, unt painui wu kol mat, Isrel wamp kᵾⱡ nga ruk ting ila ekit orung. Ei mel ku, ik mbo wu kol mat, enim nga rᵾk ting ila, ekit uing ku. Mbᵾ mo rok, ik kol elpa elpa mbᵾ nᵾk, wamp etᵾk kit munding. Wu Nuim ei ndi, rop ropa rukᵾr titim wu ei, wamp kᵾⱡ ndi, tᵾk mbuⱡ nguing. Wote, uⱡ ei mel etᵾk, wamp kᵾⱡ ndi, en enim kit muⱡing uⱡ ei, mek rukᵾr uing.

2 Peter 2

Ik Mbo Wu Kol Ropa Mbᵾ

1 Wote, unt painui wu kol mat, Isrel wamp kᵾⱡ nga ruk ting ila ekit orung. Ei mel ku, ik mbo wu kol mat, enim nga rᵾk ting ila, ekit uing ku. Mbᵾ mo rok, ik kol elpa elpa mbᵾ nᵾk, wamp etᵾk kit munding. Wu Nuim ei ndi, rop ropa rukᵾr titim wu ei, wamp kᵾⱡ ndi, tᵾk mbuⱡ nguing. Wote, uⱡ ei mel etᵾk, wamp kᵾⱡ ndi, en enim kit muⱡing uⱡ ei, mek rukᵾr uing. 2 Wote, wamp ou ndupa wapra rok, uⱡ kit elpa elpa etmᵾn mbᵾ, pep ruing. Wamp mbᵾ i etangina kᵾn, wamp wei mbᵾ ndi, nombuⱡa mam kupa ei nga nᵾk kit munding. 3 Ik mbo wamp mbᵾ, kandpa kum pindi uⱡ ei nga puⱡ wamp kᵾⱡ, i etᵾk ik kep ou nduk nok, ku moni na mat, kandᵾk kum pendᵾk ting. Wote, unt Got ndi, kᵾmp tᵾmba ui ei nga tᵾpa kun itim. Ei nga, wamp kᵾⱡ kit muⱡing. Ei nga, ur pi napᵾpa nokundpa morum.

4 Unt anggelo mat, uⱡ kit etᵾng mbᵾ, wote Got ndi, wak rui narᵾrᵾm mon! Wote elim ndi, kan ngumba pinditim ei nga, ndip kona ila pek kᵾmp tᵾmba ui ei, nokundᵾk mormᵾn. 5 Unt wamp morung mbᵾ ndi, Got tᵾk mbᵾⱡ ngurung. Wote elim ndi, wamp kᵾⱡ wak rui nᵾrᵾrᵾm mon. Wote, Got ndi nilinga, wamp kᵾⱡ kᵾn nu kui oⱡnga, wamp kᵾⱡ kit morung. Wote Nowa ni, ik kun kai ei nga, tᵾpa pena ila pendpa nitim. Ni kᵾn, Got ndi, Nowa kᵾn, wamp 7 kᵾⱡ kᵾn etpa tilinga, kont morung. 6 Got elim ndi, Sorum Gomora kona ou raⱡ, kᵾmp tᵾpa ropa ndip kᵾrᵾm. Wote, tᵾn wamp mbᵾ ndi, Got tᵾpᵾn mbuⱡ ngumᵾn ndam, uⱡ unt nga to ropa itim ei nga pilᵾmin. Ei wote, tᵾn kᵾn, i ku etpa romba ei nga ora ndunᵾm. 7 Wote Lot ndi, wamp wapra rorung uⱡ mbᵾ pilpa mbun tilinga, Got ndi, etᵾm etpa titim. 8 Ei kupa, wu kun kai ei, wamp kit kᵾⱡ nga ruk ting ila moⱡpa, wamp mbᵾ nga uⱡ kit etᵾng mbᵾ, ui mbila rᵾk rᵾk kandpa kᵾn, elim nga numan orunga mbun titim. 9 Ei nga, wote oⱡa tᵾpa kᵾni uⱡ mat, Got elim kᵾn pep rormᵾn wamp mbᵾ kᵾn, orum ndam, Nuim elim ndi, oⱡa tᵾpa kᵾni uⱡ mbila etpa tᵾtᵾm. Wote, Nuim ei ndi, wamp uⱡ kit etmin mbᵾ, tepa moⱡpa ui ou ila kᵾmp tᵾmba ku. 10 Ei kᵾn, wamp mat wapra rui uⱡ mbᵾ etᵾk, Got wu ronduⱡ ei, tᵾk mbuⱡ ngorᵾrmᵾn. Ik mbo wamp mbᵾ ndi, ik kol rok, en enim nga numan ila mint andurmin. Ei kᵾn, wote mundmong iti natᵾk kᵾn, wi muⱡ kona ila anggelo kᵾⱡ nga ik mbuldung nᵾndᵾk andᵾrmᵾn. 11 Wote, anggelo kᵾⱡ ndi, wu kᵾⱡ tᵾk mana ndurmᵾn. Wote, ik mbo wu kol rui wu kᵾⱡ nga ronduⱡ ti natᵾtᵾng. Wote anggelo kᵾⱡ, ronduⱡ mam ti tᵾtmin wamp kᵾⱡ, ik mbuldung orunga ni nandᵾk, wamp mat kᵾn, ik kit ni nandᵾk, Nuim ei nga kuimp keta ila iti natᵾtmin mon! 12 Wote wamp kᵾⱡ, kui kᵾi na mel rakra, numan mbo pi napᵾtᵾm ei mel, wote wamp kᵾⱡ, kᵾng orunga uⱡ mbᵾ mint pᵾtmin. Wote, tᵾk kan ngangina ila, pendᵾk wamp mbᵾ ndi, tᵾk rok kunding mbᵾ mel mbᵾ, pili napᵾtmin. Ei wamp mbᵾ ndi, ik kit nᵾtmin kui kᵾi na mel rakra mbᵾ, kit mormun ei mel ku, wamp mbᵾ kit muⱡing.

13 Wamp mbᵾ ndi, uⱡ kit elpa elpa etmin mbᵾ, wote punt ropa ngumba. Wamp mbᵾ, en enim nga kung orunga paka rok kᵾn, uⱡ kit mbᵾ, pena mbila ambulk palk etmin. Wamp mbᵾ, en enim nga uⱡ kol mbᵾ ambulk palk etᵾk kᵾn ok, enim kᵾn rᵾng tenda ila normin ei kᵾn, enim wamp wei mbᵾ pipil kurmin. 14 Wamp mbᵾ ndi, en enim nga mong mbᵾ ndi, amp mbᵾ rᵾk rᵾk kandᵾk, kom pendᵾk mong ting ei nga pᵾtmᵾn. Wote, wamp mbᵾ nga mong raⱡ ndi, uⱡ kit iting ei nga wak rui narᵾmᵾn mon. Wamp numan orung ronduⱡ pi nᵾpᵾrᵾm mbᵾ, kunt kan elingina, uⱡ kit mbᵾ etᵾng wamp mbᵾ, mbo endᵾk pora nduk, wamp mat nga mel mbᵾ kandᵾk kum pendᵾtᵾng. Wote Got ndi, wamp mbᵾ mot ndumba etpa romba. 15 Wamp mbᵾ ndi, uⱡ kun kai mbᵾ wak rok, i etmin uⱡ ei ndi, pilpa kungᵾndi kai ti natmᵾn. Wote, wamp mbᵾ ndi, painui wu Biyor kangᵾm Belam nga nombuⱡa mam ei pep rorung, wu ei uⱡ kit mbᵾ, etpa ku na mel mat nging nimba pilpa itim. 16 Wote, elim nga kng donggi ei, ik ni nᵾndᵾtᵾm. Ei nga, donggi ti, wamp mel ik nᵾtᵾm ei? Belam elim uⱡ ⱡawa itim ila, kng donggi ei ndi, painui wu ei nga nombuⱡa mam ei ropa ngurum.

17 Wamp i iti mbᵾ, nu kut ila nu muⱡi nambᵾrᵾm ei mel, kupa mat kᵾpkᵾ mam ei ndi, ropa munduⱡnga, mbuⱡ mbaⱡ nimba purum. Got ndi, kona rumbᵾⱡ mul ei, tᵾpa kun itim ila wamp mbᵾ ping. 18 Wote, wamp i iti mbᵾ, ke nᵾk, en enim nga orunga kaip nᵾndᵾk etmᵾn wamp mbᵾ, kunt kan elinga, wapra rui uⱡ na, uⱡ kit elpa elpa mbᵾ etmin. Ei kᵾn, wamp mat koⱡ ila, numan ropᵾl rormᵾn kunt rok, ekit tᵾk uⱡ kit mbᵾ, mbo endᵾtmᵾn. 19 Wote, wamp kit mbᵾ ndi, ei mel nᵾtmin. Mel ti ndi, tᵾn ropa mana ndui nandᵾmba. Wote, en enim ndi, uⱡ kit ei nga kongun wamp mel muⱡing. Ni kᵾn, mel ti ndi, wamp ei, tᵾpa mana ndum ndam, wamp ei mel, ei nga kindmant wamp mel moⱡmba. 20 Kupa wamp kᵾⱡ, Jisas Kraist kᵾn, pilpa kungᵾndi tᵾtᵾng ei, tᵾn nga Etpa Ti Wu Nuim ei moⱡpa, tᵾn etpa rukᵾr titim. Wote pilpa kungᵾndi ila wamp mbᵾ, nung nᵾk, ya mana mᵾi kona uⱡ ⱡar mul mbᵾ, wak rorung. Wote, uⱡ kit mbᵾ, aldpa eng ndam, wamp kᵾⱡ uⱡ kit ei ndi, tᵾpa kan ngangga kit muⱡing. Kuimp tek kit murung ei mel, wei wei etpa. Wote, kit muⱡing ei, ama kit molk pora nduing. 21 Ei kᵾn, wamp kᵾⱡ ndi, Got nga uⱡ kun kai ei nga pilpa kungᵾndi kai ei, unt pilik ti natilingina ndam, kapⱡa elinga. Wote, mi ik wingti kᵾⱡ, pilik pora nduk aldpa tᵾk mbuⱡ ngormᵾn uⱡ ei, kapⱡa mon! 22 Uⱡ ei nga, Buk Wingti ila ik ek ti petᵾm ei ndi, nimba mel, “Owa ei ndi, mik ropa mondpa, aldpa elim norum.” Wote, ik ek ti ei mel, “Kng ei, nu tepa pora ndupa, wote mba ui ila pilpil pepa ku etᵾm,” nᵾtᵾm.